Microsoft Windows-un istənilən cihaz üçün optimizasiya edilmiş versiyası üzərində çalışır

   Windows əməliyyat sistemini demək olar istənilən kompüterə quraşdırmaq olar. Lakin bu halda əməliyyat sisteminin optimizasiyası ilə bağlı problemlər yaşanır. Verilmiş yeni məlumata əsasən Microsoft yaxın gələcəkdə Windows-un xüsusi versiyasını təqdim etməklə bu problemi aradan qaldıracaq. Belə ki, əməliyyat sisteminin təqdim ediləcək xüsusi versiyası müxtəlif növ cihazlar üçün optimizasiya ediləcək. Daha öncə şirkət Windows Core adlı universal əməliyyat sistemini hazırlamağa cəhd göstərib. Əsas məqsəd resurslara nisbətən az tələbkar olan təhlükəsiz əməliyyat sistemini təqdim etmək idi.

    Lakin nəticədə Windows Core istifadəçilər üçün istifadəyə verilmə mərhələsinə çata bilmədi. Məlumata əsasən şirkət universal əməliyyat sisteminin hazırlanması ideyasından imtina etməyib. Verilmiş yeni məlumatda qeyd edilib ki, Windows-un CorePC kod adına sahib yeni versiyası desktop versiya ilə paralel şəkildə istifadəyə veriləcək. O, Windows-un modul versiyası kimi qəbul edilir və əməliyyat sisteminin qatlana bilən, kompakt ölçülü və digər növ cihazlarda optimizasiya edilməsini təmin edir. Modul struktura sahib olması səbəbilə əməliyyat sistemi ayrı-ayrı cihazlarda lazım olmayan funksiyalardan azad ola biləcək.

Məsələn əgər şirkət Chromebook analoqunu satışa çıxartmaq istəsə, onun üçün yalnız Edge brauzeri, veb və Android tətbiqləri, o cümlədən Microsoft-un ofis paketi ilə çalışa biləcək kompakt əməliyyat sistemini yığa bilər. Bu halda əməliyyat sisteminin digər funksiyaları sadəcə olaraq mövcud olmayacaqlar. Məlumata əsasən Microsoft artıq bu cür Windows versiyasını test edir və onun həcmi Windows 11 SE-dən 60-75% daha azdır. Məlumatda qeyd edilib ki, CorePC-nin digər bir versiyası süni zəka funksiyalarına sahib versiyası ola bilər. Gözləntilərə əsasən Windows-un CorePC kod adına sahib universal versiyası Windows 12 ilə eyni vaxtda istifadəyə veriləcək.